Skip to main content


ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್, ಏಕದಿನ ಲೀಗ್ ವೇಳಾಪಟ್ಟಿ ಪ್ರಕಟ

ಅಂತರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ), 2019-2023ರ ಅವಧಿಯ ವರೆಗಿನ ಫ್ಯೂಚರ್ ಟೂರ್ ಪ್ರೋಗ್ರಾಂ (ಎಫ್‌ಟಿಪಿ) ಪ್ರಕಟಿಸಿದೆ. ಇದರಂತೆ 2019 ಜುಲೈನಲ್ಲಿಇದೇ ಮೊದಲ ಬಾರಿಗೆ ಐಸಿಸಿ ಆಯೋಜಿಸುತ್ತಿರುವ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ಟೀಮ್ ಇಂಡಿಯಾ ಮಾಜಿ ಟೆಸ್ಟ್ ಕಲಿ ವೆಸ್ಟ್‌ಇಂಡೀಸ್ ಸವಾಲನ್ನು ಎದುರಿಸಲಿದೆ. ಹಾಗೆಯೇ 13 ತಂಡಗಳ ಏಕದಿನ ಲೀಗ್‌ಗೆ 2020ರಲ್ಲಿ ಶ್ರೀಲಂಕಾ ವಿರುದ್ಧ ಸ್ಪರ್ಧಿಸುವ ಮೂಲಕ ಚಾಲನೆ ದೊರಕಲಿದೆ.

ಎಲ್ಲ ತಂಡಗಳ ಮೂರು ಪ್ರಕಾರದ ಆಟಗಳ ವೇಳಾಪಟ್ಟಿಯನ್ನು ಐಸಿಸಿ ಪ್ರಕಟಿಸಿದೆ. ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ 2019 ಜುಲೈ 15ರಿಂದ 2021 ಏಪ್ರಿಲ್ 30ರ ವರೆಗೆ ನಡೆಯಲಿದೆ. ಈ ಎರಡು ವರ್ಷಗಳ ಅವಧಿಯಲ್ಲಿ ಪರಸ್ಪರ ಆಯ್ಕೆ ಮಾಡಿದ ತಂಡಗಳು ಮನೆಯಂಗಳ ಹಾಗೂ ಹೊರಗಡೆ ಆರು ಸರಣಿಗಳಲ್ಲಿ ಭಾಗವಹಿಸಲಿದೆ. ಬಳಿಕ ಅಗ್ರ ಎರಡು ತಂಡಗಳು ಫೈನಲ್‌ಗೆ ಪ್ರವೇಶಿಸಲಿದೆ.  ಸಾಂಪ್ರದಾಯಿಕ ಬದ್ಧ ವೈರಿಗಳಾದ ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾ ನಡುವಣ ಆ್ಯಶಸ್ ಸರಣಿಯೊಂದಿಗೆ ಐಸಿಸಿ ಟೆಸ್ಟ್ ಚಾಂಪಿಯನ್‌ಶಿಪ್‌ಗೆ ಚಾಲನೆ ದೊರಕಲಿದೆ. 

ಹಾಗೆಯೇ ಏಕದಿನ ಲೀಗ್‌ನಲ್ಲಿ 13 ತಂಡಗಳು (ಹಾಲೆಂಡ್ ಸೇರಿದಂತೆ) ಭಾಗವಹಿಸಲಿದೆ. ಪ್ರಸ್ತುತ ಟೂರ್ನಿಯು 2020 ಮೇ 1ರಿಂದ 2022 ಮಾರ್ಚ್ 31ರ ವರೆಗೆ ನಡೆಯಲಿದೆ. ಈ ವೇಳೆಯಲ್ಲಿ ಪ್ರತಿ ತಂಡಗಳು ಮನೆಯಂಗಳ ಹಾಗೂ ಹೊರಗಡೆ ಎಂಟು ಸರಣಿಗಳಲ್ಲಿ ಭಾಗವಹಿಸಲಿದೆ. 2023 ಏಕದಿನ ವಿಶ್ವಕಪ್‌ ಅರ್ಹತೆಗೆ ಇದನ್ನೇ ಮಾನದಂಡವಾಗಿಸಿದೆ. ಆತಿಥೇಯ ಭಾರತ ಸೇರಿದಂತೆ ಏಳು ತಂಡಗಳು ನೇರ ಅರ್ಹತೆಯನ್ನು ಪಡೆಯಲಿದೆ. ಉಳಿದ ಐದು ತಂಡಗಳಿಗೆ ಎರಡನೇ ಅವಕಾಶ ದೊರಕಲಿದ್ದು, ಐಸಿಸಿ ವಿಶ್ವಕಪ್ ಅರ್ಹತಾ ಟೂರ್ನಿಯಲ್ಲಿ ಭಾಗವಹಿಸಬೇಕಾಗುತ್ತದೆ.   

short by Pawan / more at Vijayakarnataka

Comments